АНУ Канадын зарим нэр төрлийн бараанд 50 хувийн нэмэлт тариф ногдуулна

АНУ-ын Ерөнхийлөгч Дональд Трамп Канадын зарим нэр төрлийн бараанд 50 хувийн нэмэлт тариф ногдуулах тухай тунхаглалд гарын үсэг зурлаа.

Цагаан ордны мэдээлснээр, энэхүү шийдвэрийг 1930 оны "Смут-Хоулигийн тарифын тухай хууль"-ийн 338 дугаар хэсгийг үндэслэн гаргасан бөгөөд шинэ тарифын зохицуулалт АНУ-ын зүүн бүсийн цагаар 2026 оны наймдугаар сарын 19-нөөс хэрэгжиж эхлэх юм.

Цагаан ордон Канадын худалдааны бодлого нь АНУ-ын бизнес эрхлэгчдэд ялгавартай нөхцөл үүсгэж, эдийн засгийн хохирол учруулж байгаа тул хариу арга хэмжээ авч буйгаа мэдэгджээ.

Мэдэгдэлд дурдсанаар, Канад улс АНУ-д үйлдвэрлэсэн автомашинд тариф болон квотын хязгаарлалт тогтоодог ч бусад орны автомашинд ижил шаардлага тавьдаггүй байна. Мөн тарифын квотын бодлогоор дамжуулан АНУ-ын автомашин үйлдвэрлэгчдийг Канадын нутаг дэвсгэрт хөрөнгө оруулж, үйлдвэрлэл явуулахад хүргэдэг гэж үзжээ.

Түүнчлэн Канадын ихэнх муж, бүс нутаг АНУ-ын согтууруулах ундааны худалдан авалт, жижиглэн худалдаанд хязгаарлалт тогтоосон атлаа бусад улсын бүтээгдэхүүнд ийм арга хэмжээ авдаггүй гэж Цагаан ордон мэдэгдсэн байна.

Мөн Канад улс АНУ-аас импортолж буй бяслагт Европын Холбооны ижил төрлийн бүтээгдэхүүнээс өндөр тарифын квот мөрддөг хэмээн онцолжээ.